صدر آزاد کشمیر بیرسٹر سلطان محمود چوہدری نے کہا ہے کہ بر صغیر کے مسلمانوں نے اپنے لیے ایک ایسے علیحدہ وطن کا جمہوری مطالبہ کرنے کے لیے متحد ہونے کا فیصلہ کیا جہاں وہ اپنی زندگی اپنے اسلامی اقدار، روایات انصاف، برابری اور آزادی سے گزار سکیں۔
ایک مضبوط اور مستحکم پاکستان کشمیر کی آزادی کا ضامن ہے۔ 23مارچ1940 کا دن اہل پاکستان اور ریاست جموں وکشمیر کے مسلمانوں کی تاریخ میں ایک سنگ میل کی حیثیت رکھتا ہے اور اہل کشمیر کے لیے اس اعتبار سے بھی اہمیت کا حامل ہے کہ 23مارچ1940 کے دن لاہور میں ہونیو الے تاریخ ساز اجتماع میں کشمیری نمائندگان نے بھی شرکت کر کے حضرت علامہ محمد اقبال ؒکے خواب کی تعبیر کو عملی جامہ پہنانے کے لئے بانی پاکستان قائد اعظم محمد علی جناحؒ کی قیادت میں اپنی سیاسی منزل اور مستقبل کا تعین کیا تھا۔
یوم پاکستان کے مو قع پر انہوں نے ان خیالات کا اظہار اپنے خصوصی پیغام میں کیا۔ صدرریاست آزادکشمیر بیرسٹر سلطان محمود چوہدری نے کہا کہ آج کے دن ہم بانیان پاکستان کی قربانیوں اور جہدوجہد کو خراج عقیدت پیش کرتے ہیں اور ایک مرتبہ پھر ان نظریات پر کاربند رہنے کا عزم کرتے ہیں جو نظریہ پاکستان کی بنیاد ہیں۔ ہم یقین محکم پر کاربند رہتے ہوئے متحد ہوں اور نظم و ضبط کے ساتھ محنت سے کام کرنے کا عزم کریں تاکہ پاکستان کو مزید مضبوط اور خوشحال بنائیں۔
