وفاقی وزیر اطلاعات و نشریات عطاء اللہ تارڑ نے نیشنل پریس کلب کے نومنتخب صدر عبدالرزاق سیال اور سیکریٹری ڈاکٹر فرقان راؤ سے ملاقات کی، جس کی قیادت سینئر صحافی حاجی نواز رضا نے کی۔
ملاقات میں وفاقی وزیر نے نیشنل پریس کلب کے انتخابات میں کامیاب ہونے والے دونوں گروپوں، ڈیموکریٹس اور جرنلسٹ پینل کے عہدیداران کو مبارکباد دی اور ایگزیکٹو باڈی کے ارکان کے لیے نیک خواہشات کا اظہار کیا۔
عطاء اللہ تارڑ نے صحافی برادری کو درپیش مسائل اور دیگر اہم امور پر تبادلہ خیال کیا اور کہا کہ نیشنل پریس کلب صحافیوں کی مضبوط آواز ہے۔ انہوں نے مزید کہا کہ کلب صحافی برادری کے مسائل کے حل اور پیشہ ورانہ اقدار کے فروغ میں اہم کردار ادا کر رہا ہے اور حکومت صحافیوں کی فلاح و بہبود اور میڈیا کے مسائل کے حل کے لیے ہر ممکن تعاون جاری رکھے گی۔
ملاقات کے دوران ہاؤسنگ کوٹہ، نیشنل پریس کلب کو پی ایس ڈی پی میں ملنے والی گرانٹ اور ہیلتھ انشورنس کے امور پر بھی تفصیلی گفتگو ہوئی۔ وفاقی وزیر اطلاعات نے وفاقی سیکریٹری اطلاعات کو پی ایس ڈی پی کے تحت نیشنل پریس کلب کی عمارت کے لیے گرانٹ کے معاملے پر ضروری ہدایات جاری کیں۔
عطاءاللہ تارڑ نے کہا کہ صحافی برادری کے مسائل کے حل کے لیے وزارت اطلاعات اپنا کردار جاری رکھے گی اور متعلقہ معاملات کے حل کے لیے ہر ممکن اقدامات کیے جائیں گے۔
