چارسدہ: وفاقی وزیر داخلہ محسن نقوی نے فیڈرل کانسٹیبلری ٹریننگ سینٹر شب قدر کا دورہ کیا۔
وفاقی وزیر نے اینٹی رائٹ ونگ کی خصوصی تربیتی مشقوں کا معائنہ کیا۔
انہوں نے اہلکاروں کی پیشہ وارانہ صلاحیتوں، جدید تربیت اور آپریشنل تیاری کو سراہا۔
دورے کے دوران اہلکاروں نے ہجوم کنٹرول، حساس مقامات کے تحفظ، پرتشدد صورتحال سے نمٹنے اور امن و امان برقرار رکھنے سے متعلق عملی مشقوں کا مظاہرہ کیا۔
وفاقی وزیر داخلہ نے کہا کہ اینٹی رائٹ فورس کو جدید خطوط پر تربیت دی گئی ہے اور یہ فورس امن و امان کی کسی بھی صورتحال سے نمٹنے کے لیے مکمل طور پر تیار ہے۔
محسن نقوی نے واضح کیا کہ ملک کے امن و امان اور استحکام کو کسی صورت سبوتاژ کرنے کی اجازت نہیں دیں گے۔
انہوں نے کہا کہ پُرامن احتجاج ہر شہری کا حق ہے اور قانون نے احتجاج کا طریقہ کار واضح کر رکھا ہے۔
احتجاج کی آڑ میں تشدد، توڑ پھوڑ اور سرکاری و نجی املاک کو نقصان پہنچانے کی اجازت نہیں دی جا سکتی۔
ریاست اپنی ذمہ داری پوری کرے گی اور قانون ہاتھ میں لینے والے عناصر سے قانون کے مطابق نمٹا جائے گا۔
وفاقی وزیر داخلہ نے کہا کہ امن و امان کی موجودہ صورتحال میں فیڈرل کانسٹیبلری کا کردار پورے ملک میں انتہائی اہمیت کا حامل ہے۔
انہوں نے اہلکاروں کو ہدایت کی کہ وہ ہر قسم کے چیلنجز کا مقابلہ کرنے کے لیے اپنی تربیت مکمل کریں۔
اہلکاروں کی حفاظت کے لیے بین الاقوامی معیار کا جدید پروٹیکشن گیئر فراہم کیا جا رہا ہے اور تمام جوانوں کو گیس ماسک دیے جائیں گے۔
محسن نقوی نے ایف سی ہیڈکوارٹر میں کھیلوں کی بہترین سہولتیں اور عالمی معیار کا سوئمنگ پول بنانے کا اعلان کیا۔
انہوں نے بیرکس کا دورہ کر کے اہلکاروں کے مسائل سنے اور تمام واش رومز ازسرنو تعمیر کرنے کی ہدایت دی۔
لوڈشیڈنگ کے مسئلے پر اہلکاروں نے بتایا کہ اب بلا تعطل بجلی فراہم کی جا رہی ہے۔
اس موقع پر آئی جی فیڈرل کانسٹیبلری، ڈی آئی جی ٹریننگ، ڈی او ایف سی اور دیگر اعلیٰ افسران بھی موجود تھے۔
