لاہور: وزیراعلیٰ پنجاب مریم نواز شریف نے وفد کے ہمراہ چین میں ہواوے کے اعلیٰ حکام سے ملاقات کی۔
ہواوے حکام نے وفد کا پُرتپاک خیر مقدم کیا۔
ملاقات میں پنجاب کو مصنوعی ذہانت سے لیس صوبہ بنانے کے لیے سٹریٹجک شراکت داری پر اتفاق کیا گیا۔
وزیراعلیٰ مریم نواز شریف نے پنجاب کے ساتھ ہواوے کی اشتراک کار کا خیر مقدم کرتے ہوئے کمپنی کو نواز شریف آئی ٹی سٹی میں بھرپور سرمایہ کاری کی دعوت دی۔
ملاقات میں پنجاب کے ایک ہزار نوجوانوں کو ہواوے ماسٹر ٹرینر کے طور پر تربیت دینے اور 300 خواتین ٹرینرز کو اے آئی ٹریننگ فراہم کرنے پر بھی اتفاق کیا گیا۔
ملاقات میں نواز شریف آئی ٹی سٹی میں 6 ڈیٹا سنٹرز اور ساورن ڈیٹا سنٹر کے قیام، پنجاب میں مصنوعی ذہانت، کلاؤڈ ٹیکنالوجیز، ڈیجیٹل انفراسٹرکچر، ٹیلنٹ ڈویلپمنٹ اور سمارٹ پبلک سروسز کے روڈ میپ کا جائزہ لیا گیا۔
وزیراعلیٰ مریم نواز شریف نے کہا کہ پنجاب کو مصنوعی ذہانت کے میدان میں آگے بڑھانا اولین ترجیح ہے۔
پنجاب حکومت کارکردگی، شفافیت، فیصلہ سازی اور عوامی خدمات کے معیار میں ٹیکنالوجی کا بھرپور استعمال کر رہی ہے۔
ہواوے کے سینئر ایگزیکٹو نے کہا کہ ڈیجیٹل تبدیلی اور پائیدار ترقی کو آگے بڑھانے کے لیے ہواوے پنجاب کے ساتھ کام جاری رکھے گا۔
