مری کے علاقے کوٹلی ستیاں میں محکمہ جنگلات نے جنگلات کی غیر قانونی کٹائی اور لکڑی کی غیر قانونی چیرائی کے خلاف کارروائی کرتے ہوئے متعدد غیر قانونی آرا مشینیں سیل کر دیں، جبکہ بھاری مقدار میں لکڑی اور دیگر سامان بھی قبضے میں لے لیا گیا۔
ذرائع کے مطابق کارروائی ڈویژنل فاریسٹ آفیسر (ڈی ایف او) عمر عتیق اور ان کی ٹیم نے کی۔ محکمہ جنگلات کی ٹیم نے کارروائی کے دوران غیر قانونی آرا مشینوں کو سیل کیا اور موقع پر موجود لکڑی و دیگر سامان ضبط کرلیا۔
محکمہ جنگلات کے حکام کے مطابق مبینہ طور پر ٹمبر مافیا ان غیر قانونی آرا مشینوں کے ذریعے کوٹلی ستیاں، مری اور کہوٹہ کے جنگلات سے کاٹی جانے والی لکڑی کی چیرائی میں ملوث تھا۔
حکام کا کہنا ہے کہ کارروائیاں وزیراعلیٰ پنجاب مریم نواز شریف کے وژن ’’گرین پنجاب‘‘ اور وزیر جنگلات مریم اورنگزیب کی خصوصی ہدایات پر جاری ہیں۔ ان اقدامات کا مقصد جنگلات کی غیر قانونی کٹائی اور لکڑی کے غیر قانونی کاروبار کا خاتمہ ہے۔
ڈی ایف او عمر عتیق نے کہا کہ جنگلات اور قدرتی وسائل کو نقصان پہنچانے والے عناصر کے خلاف بلاامتیاز کارروائی جاری رکھی جائے گی۔ انہوں نے کہا کہ جنگلات کے تحفظ کے لیے قانون پر سختی سے عملدرآمد یقینی بنایا جائے گا۔
مری، کہوٹہ، کوٹلی ستیاں اور کلر سیداں کے پہاڑی علاقے اپنے گھنے جنگلات اور بلند و بالا درختوں کی وجہ سے قدرتی حسن رکھتے ہیں۔ یہ جنگلات نہ صرف ماحول کو صاف رکھنے میں اہم کردار ادا کرتے ہیں بلکہ سیاحت کے فروغ کا بھی اہم ذریعہ ہیں۔
ماحولیاتی ماہرین اور مقامی شہریوں نے محکمہ جنگلات کی کارروائی کو خوش آئند قرار دیا ہے۔ انہوں نے مطالبہ کیا کہ جنگلات کے تحفظ کے لیے نگرانی کا نظام مزید مؤثر بنایا جائے تاکہ ان علاقوں کے قدرتی حسن، ماحول اور آنے والی نسلوں کے مستقبل کو محفوظ بنایا جا سکے۔
