وزیراعظم آزاد کشمیر نے افغانستان کی جانب سے پاک افغان سرحد پر ہونے والی بلاجواز جارحیت کی شدید الفاظ میں مذمت کرتے ہوئے کہا ہے کہ پاکستان کی خودمختاری پر کوئی سمجھوتہ نہیں کیا جائے گا۔
اپنے ایک بیان میں وزیراعظم آزاد کشمیر فیصل ممتاز راٹھور نے پاک فوج کی جانب سے دشمن کو بھرپور اور اعصاب شکن جواب دینے پر زبردست خراجِ تحسین پیش کیا اور کہا کہ الحمدللہ پاکستان کی مسلح افواج دشمن کو اس کی اوقات یاد دلا رہی ہیں۔
آزاد کشمیر کے عوام مشکل کی اس گھڑی میں اپنی مسلح افواج کے شانہ بشانہ کھڑے ہیں اور ملکی دفاع کے لیے ہر قربانی دینے کو تیار ہیں۔فیلڈ مارشل سید عاصم منیر کی قیادت میں پاکستان کی مسلح افواج ہر چیلنج سے نمٹنے کے لیے ہمہ وقت تیار ہیں اور دشمن کی تمام غلط فہمیاں دور کر دی جائیں گی۔
خطے میں پائیدار امن کے قیام کے لیے ضروری ہے کہ افغانستان اپنی سرزمین کو پڑوسی ممالک کے خلاف استعمال ہونے سے روکے۔قوم کے حوصلے بلند ہیں اور پوری پاکستانی قوم اپنی بہادر افواج کے ساتھ کھڑی ہے۔
ہماری دعائیں جنگ کے محاذ پر برسرِ پیکار جوانوں کی سلامتی اور پاکستان کی فتح کے لیے ہیں۔ان شاء اللہ دشمن اپنے انجام کو ضرور پہنچے گا اور اللہ تعالیٰ پاکستان کو ہر محاذ پر سرخرو فرمائے گا۔
