گلگت بلتستان سکاوٹس کی 17ویں بیچ کی شاندار پاسنگ آؤٹ پریڈ منعقد ہوئی، جس میں 450 جوانوں نے کامیابی کے ساتھ اپنی عسکری تربیت مکمل کر لی۔ تقریب میں جوانوں نے بہترین نظم و ضبط اور پیشہ ورانہ مہارت کا مظاہرہ کرتے ہوئے مارچ پاسٹ کیا اور اپنے عزم و حوصلے کا عملی ثبوت پیش کیا۔
تقریب کے مہمانِ خصوصی فورس کمانڈ نادرن ایریاز (ایف سی این اے) کے کمانڈر تھے، جنہوں نے پریڈ کا معائنہ کیا اور پاس آؤٹ ہونے والے جوانوں کو مبارکباد پیش کی۔ اپنے خطاب میں انہوں نے کہا کہ گلگت بلتستان سکاؤٹس، خطے کے بہادر محافظ ہیں جو ہر وقت مادرِ وطن کے دفاع اور امن و امان کے قیام کے لیے مستعد رہتے ہیں۔
کمانڈر ایف سی این اے نے جوانوں کی محنت، لگن اور پیشہ ورانہ تربیت کو سراہتے ہوئے اس امید کا اظہار کیا کہ وہ اپنی ذمہ داریاں ایمانداری اور فرض شناسی کے ساتھ نبھائیں گے۔
تقریب کے اختتام پر مہمانِ خصوصی نے نمایاں کارکردگی دکھانے والے جوانوں میں انعامات اور اعزازی اسناد تقسیم کیں۔ اس پروقار تقریب میں افسران، جوانوں کے اہل خانہ اور معززین کی بڑی تعداد نے شرکت کی اور اس یادگار لمحے کا حصہ بنے۔
