پاکستان کرکٹ بورڈ (پی سی بی) کے گورننگ بورڈ کا اجلاس 6 فروری کو طلب، نئے چیئرمین پی سی بی کا انتخاب ہوگا۔
قائم مقام چیئرمین اور الیکشن کمشنر شاہ خاور کی جانب سے پی سی بی گورننگ بورڈ کا خصوصی اجلاس طلب کرلیا گیا ہے۔ دس رکنی گورننگ بورڈ کا اجلاس 6 فروری کو دوپہر دو بجے طلب کیا گیا ہے۔ پیر کو پی سی بی کے ایک بیان میں کہا گیا کہ اس اہم اجلاس کا نوٹس پی سی بی کے آئین 2014 کی دفعات کے مطابق جاری کیا گیا ہے۔ اجلاس میں کرکٹ بورڈ کے تمام اراکین کی شرکت لازمی قرار دی گئی ہے۔
زرائع کے مطابق نئے چیئرمین پی سی بی کے لیے وزیراعظم کی طرف سے نامزد کردہ مصطفیٰ رمدے اور وزیراعلیٰ پنجاب سید محسن رضا نقوی امیدوار ہیں۔ دس رکنی گورننگ بورڈ میں بہاولپور ریجن کے صدر طارق سرور، ڈیرہ مراد جمالی کے صدر ظفراللہ جدگال، آزاد جموں و کشمیر ریجن کے صدر سجاد علی کھوکھر اور لاڑکانہ ریجن کے صدر تنویر احمد شامل ہیں۔
خیال رہے کہ ملک کی کرکٹ گورننگ باڈی گزشتہ 13 ماہ سے چیئرمین کے بغیر تھی اور اس دوران پی سی بی کو دو الگ الگ عبوری انتظامی کمیٹیاں چلا رہی تھیں۔
