پاکستان تحریک انصاف (پی ٹی آئی) کے سیکرٹری اطلاعات رؤف حسن پر نامعلوم افراد نے حملہ کردیا، جس سے وہ زخمی ہوگئے۔ سیکرٹری اطلاعات رؤف حسن پر حملے کا مقدمہ درج کر لیا گیا۔
مقدمہ اسلام آباد کے آبپارہ تھانے میں درج کیا گیا ہے جس میں قتل کی کوشش، جان سے مارنے کی دھمکیاں اور دیگر الزامات شامل ہیں۔ پی ٹی آئی رہنما رؤف حسن کی فرسٹ انفارمیشن رپورٹ (ایف آئی آر) نامعلوم خواجہ سراؤں کے خلاف درج کر لی گئی ہے۔
رؤف حسن کی ایف آئی آر کے متن کے مطابق وہ ایک ٹی وی پروگرام میں شرکت کے بعد جی این این اسلام آباد آفس کے بعد پارکنگ میں جا رہے تھے۔ ایک شخص جو کہ خواجہ سرا معلوم ہوتا تھا انھیں روکا اور ان پر حملہ کیا۔
ان کا کہنا تھا کہ : “اسی وقت تین اور خواجہ سرا آئے اور مجھ پر جان لیوا حملہ کیا۔ انہوں نے مجھے مارنے کے لیے تیز دھار ہتھیار سے میرا گلا کاٹنے کی کوشش کی۔ جب میں اپنے آپ کو بچانے کے لیے واپس چلا گیا تو مجھے ایک تیز دھار ہتھیار سے چہرے پر کاٹ دیا گیا۔ پی ٹی آئی رہنما نے ایف آئی آر میں کہا ہے کہ دو روز قبل اسلام آباد کے بلیو ایریا میں ان پر اسی طرح کے حملے کی کوشش کی گئی۔
واضح رہے کہ پی ٹی آئی کے مرکزی سیکرٹری اطلاعات رؤف حسن پر جی سیون سینٹر اسلام آباد میں جی این این کے دفتر کے باہر خواجہ سراؤں نے بلیڈ سے حملہ کیا تھا جس میں ان کے چہرے پر زخم آئے تھے۔
