ہری پور: خانپور ڈیم میں پانی کی سطح خطرناک حد تک کم ہو گئی ہے، اور اب ذخیرہ صرف 9 فٹ رہ گیا ہے۔ ترجمان واپڈا کے مطابق، ڈیم میں پانی کی موجودہ سطح 1919 فٹ پر پہنچ گئی ہے، جبکہ اس کا ڈیڈ لیول 1910 فٹ ہے، یعنی صرف 9 فٹ کا فرق باقی ہے۔
ترجمان نے مزید بتایا کہ پانی کی آمد انتہائی کم ہو کر صرف 25 کیوسک رہ گئی ہے، جس سے نہ صرف آبی ذخائر میں کمی واقع ہو رہی ہے بلکہ آبی حیات کو بھی شدید خطرات لاحق ہو گئے ہیں۔
پانی کی اس کمی کے باعث خیبرپختونخواہ اور پنجاب کو زرعی اراضی کی آبپاشی کے لیے پانی کی فراہمی مکمل طور پر بند کر دی گئی ہے۔ ترجمان کا کہنا ہے کہ اسلام آباد کے سی ڈی اے اور راولپنڈی شہر کو اس وقت صرف 50 کیوسک پانی فراہم کیا جا رہا ہے، جو ضرورت سے کہیں کم ہے۔
ترجمان نے خبردار کیا ہے کہ اگر بارشیں مزید نہ ہوئیں تو راولپنڈی اور اسلام آباد میں پانی کا بحران مزید شدت اختیار کر لے گا۔ شہری علاقوں میں پہلے ہی پانی کی قلت محسوس کی جا رہی ہے، اور اگر صورتحال برقرار رہی تو شدید مسائل جنم لے سکتے ہیں۔
