ایران اور امریکہ کے درمیان مذاکرات کے دوسرے دور کا امکان ظاہر کیا جا رہا ہے، جبکہ سیکیورٹی خدشات کے پیش نظر جڑواں شہروں اسلام آباد اور راولپنڈی میں پبلک، پرائیویٹ اور بھاری ٹرانسپورٹ کو عارضی طور پر بند کرنے کا اعلان کر دیا گیا ہے۔
ضلعی انتظامیہ کے مطابق یہ اقدامات دونوں شہروں میں سیکیورٹی کو یقینی بنانے کے لیے کیے گئے ہیں۔ اسلام آباد کی ضلعی انتظامیہ نے ہر قسم کی ٹرانسپورٹ عارضی طور پر معطل کرنے کا اعلان کیا ہے اور کہا ہے کہ کسی بھی نئی پیش رفت سے عوام کو آگاہ کیا جائے گا۔
ڈپٹی کمشنر راولپنڈی کی جانب سے جاری بیان کے مطابق راولپنڈی میں بھی ہر قسم کی پرائیویٹ، پبلک اور بھاری ٹرانسپورٹ سروسز عارضی طور پر معطل کر دی گئی ہیں۔
ضلعی انتظامیہ کا کہنا ہے کہ یہ پابندیاں سیکیورٹی خدشات کے پیش نظر لگائی گئی ہیں اور عوام سے اپیل کی گئی ہے کہ وہ قانون نافذ کرنے والے اداروں کے ساتھ تعاون کریں۔
ذرائع کے مطابق جڑواں شہروں میں ہوٹلوں اور ریسٹورنٹس کو بھی بند کر دیا گیا ہے، جبکہ مختلف اطلاعات میں کہا گیا ہے کہ یہ اقدامات غیر ملکی وفود کی اسلام آباد آمد کے پیش نظر کیے گئے ہیں۔
