مری میں سیاحوں کی گاڑی حادثے کا شکار ہوگئی،ضلعی انتظامیہ کے مطابق حادثےکے نتیجے میں 10 سیاح جاں بحق اور متعدد زخمی ہو گئے ۔
مری: ڈپٹی کمشنر آغا ظہیر عباس شیرازی کے مطابق مری ایکسپریس وے پر کھجٹ کے مقام پر سیاحوں کی وین حادثے کا شکار ہوگئی ۔
ڈی سی نے بتایا کہ حادثے میں 10 سیاح جاں بحق ہو گئے جب کہ متعدد افراد زخمی ہیں جنہیں فوری طبی امداد کے لیے قریبی ہسپتال منتقل کردیا گیا ہے ۔
ڈپٹی کمشنر نے مزید بتایا کہ مسافر وین میں سوار 23 افراد کا تعلق ملتان سے تھا، مسافر رات 2 بجے ملتان سے مری کے سفر پر نکلے تھے، گاڑی اوور سپیڈ ہونے کے باعث سائیڈ دیوار سے جاٹکرائی جس سے گاڑی کے انجن میں آگ بھڑک اٹھی اور سلائیڈنگ دروازہ بھی لاک ہوگیا ۔
موٹروے پولیس کا کہنا ہےکہ مری ایکسپریس وے وین حادثے میں 13 افراد زخمی بھی ہوئے ہیں جنہیں فوری طبی امداد کے لیے ہسپتال منتقل کردیا گیا ہے ۔
