لوکل گورنمنٹ ایمپلائز فیڈریشن خیبر پختونخوا کی کال پر تحصیل میونسپل ایڈمنسٹریشن (ٹی ایم اے) ہری پور میں ملازمین نے قلم چھوڑ ہڑتال کرتے ہوئے دفاتر بند کر دیئے، ہڑتال کے باعث شہریوں کو مختلف امور میں مشکلات کا سامنا کرنا پڑا ۔
ہری پور: ہڑتالی ملازمین کا کہنا ہے کہ صوبائی حکومت فوری طور پر ٹی ایم اے ملازمین کی تنخواہیں اور پنشن اکاؤنٹ فور میں منتقل کرے، کیونکہ دیگر تمام صوبائی محکموں کے ملازمین کو ہر ماہ باقاعدگی سے اکاؤنٹ فور کے ذریعے ادائیگیاں کی جا رہی ہیں، جبکہ ٹی ایم اے ملازمین کو دو، دو ماہ تک تنخواہوں کی ادائیگی نہیں ہوتی ۔
چیئرمین ایکشن کمیٹی ٹی ایم اے سردار محمد جاوید نے کہا کہ بروقت تنخواہیں نہ ملنے کے باعث ملازمین شدید مالی مشکلات اور ذہنی اذیت کا شکار ہیں ۔
انہوں نے خبردار کیا کہ اگر مطالبات منظور نہ کیے گئے تو صوبائی قیادت کی آئندہ کال پر بھرپور احتجاجی تحریک چلائی جائے گی اور تمام سروسز بند کر دی جائیں گی ۔
اس موقع پر چیئرمین ایپکا ہری پور گل نواز خان نے بھی ملازمین کے مطالبات کی حمایت کرتے ہوئے کہا کہ حکومت فوری طور پر مسئلے کا نوٹس لے اور ملازمین کو درپیش مشکلات کا ازالہ کرے، بصورت دیگر احتجاج کا دائرہ مزید وسیع کیا جائے گا ۔
