اسلام آباد: ترجمان دفترِ خارجہ نے کہا ہے کہ خطے میں بدلتی ہوئی صورتحال کے پیشِ نظر حکومتِ پاکستان نے ایران سے پاکستانی شہریوں کے انخلا اور بیرونِ ملک مختلف مقامات پر پھنسے ہوئے پاکستانیوں کی معاونت کے لیے مؤثر اقدامات کیے ہیں۔
وزارتِ خارجہ کا کرائسز مینجمنٹ یونٹ چوبیس گھنٹے سرگرم ہے اور صورتحال کی مسلسل نگرانی کرتے ہوئے پاکستانی شہریوں کو ضروری معاونت فراہم کر رہا ہے۔ وزیرِ اعظم کی ہدایات پر بیرونِ ملک پاکستان کے سفارتی مشنز میں خصوصی سہولت ڈیسک قائم کیے گئے ہیں جہاں پھنسے ہوئے پاکستانی شہریوں کو ویزا سہولت، سفری انتظامات اور لاجسٹکس میں مدد فراہم کی جا رہی ہے۔ اس مقصد کے لیے خصوصی موبائل ایپلیکیشنز، رجسٹریشن پورٹلز اور ہیلپ لائنز بھی متعارف کرائی گئی ہیں تاکہ پاکستانی شہریوں تک بروقت رسائی اور معاونت یقینی بنائی جا سکے۔
ترجمان کے مطابق پاکستان کے سفارتی مشنز میزبان ممالک کی حکومتوں کے ساتھ قریبی رابطے میں ہیں تاکہ پاکستانی برادری کو ضروری قونصلر سہولیات فراہم کی جا سکیں۔ فضائی روابط کی جزوی بحالی کے بعد بیرونِ ملک پھنسے ہوئے پاکستانی شہری کمرشل پروازوں کے ذریعے بتدریج اپنی منزلوں کی جانب روانہ ہونا شروع ہو گئے ہیں جبکہ حکومتِ پاکستان بیرونِ ملک مقیم پاکستانیوں کی فلاح و بہبود کے تحفظ اور ان کی محفوظ اور بروقت واپسی کو یقینی بنانے کے لیے مکمل طور پر پُرعزم ہے۔ وزارتِ خارجہ اور بیرونِ ملک پاکستانی مشنز کی ہنگامی رابطہ تفصیلات وزارت کی ویب سائٹ پر دستیاب ہیں۔
