اسلام آباد: انسداد دہشت گردی کے لیے نیشنل ایکشن پلان پر عملدرآمد کيلئے قائم ایپکس کمیٹی کا آج ہونیوالا اہم اجلاس مؤخر کردیا گیا۔
ذرائع کے مطابق وزیر اعظم شہباز شریف کی طبیعت خرابی کے باعث اجلاس مؤخر کیا گیا ہے، اجلاس کی نئی تاریخ اور وقت کا تعین جلد کیا جائے گا۔
اجلاس میں وفاقی وزرا، تینوں مسلح افواج کے سربراہان، وزرائے اعلیٰ، انٹیلی جنس اداروں کے سربراہان کو بھی شرکت کی دعوت دی گئی تھی، اجلاس میں امن وامان کی مجموعی صورتحال کا تفصیلی جائزہ لیا جانا تھا۔
انسداد دہشت گردی کے قومی ایکشن پلان پر عمل درآمد کی صورت حال بھی زیر غور آنی تھی جبکہ صوبوں اور وفاق کے درمیان کوآرڈی نیشن بہتر بنانے اور انٹیلی جنس معلومات کی مؤثر شیئرنگ پر بھی غور کرنا اجلاس کے ایجنڈے میں شامل تھا، خیبر پختونخوا اور بلوچستان میں دہشت گردی کے بڑھتے واقعات کی وجوہات کا بھی جائزہ لیا جانا تھا۔
