بنوں میں گاڑی پر فائرنگ کے نتیجے میں اسسٹنٹ کمشنر میرانشاہ اور 2 پولیس اہلکاروں سمیت 4 افراد شہید ہو گئے، پولیس حکام کے مطابق حملے کے بعد نامعلوم مسلح افراد زخمی پولیس اہلکاروں سے اسلحہ چہین کر ساتھ بھی لے گئے، دوسری شہدا کی نماز جنازہ بھی ادا کردی گئی ہے ۔
بنوں: پولیس کے مطابق بنوں میں میران شاہ روڈ پر اسسٹنٹ کمشنر شمالی وزیرستان شاہ ولی کی گاڑی پر پہلے سے موجود دہشتگردوں نے فائرنگ کی ، واقعہ بنوں میں میرانشاہ روڈ پر فلور ملز کے قریب پیش آیا جس میں اسسٹنٹ کمشنر اور 2 پولیس اہل کاروں سمیت 4 افراد شہید ہو گئے ۔
پولیس حکام نے بتایا کہ حملہ آور زخمی اہلکاروں سے اسلحہ بھی چھین کر لے گئے، حملہ آوروں نے بعد ازاں گاڑی کو بھی نذر آتش کردیا ۔
اطلاع ملتے ہی پولیس کی نفری جائے وقوع پر پہنچی اور شواہد جمع کرکے لاشوں و زخمیوں کو ہسپتال منتقل کیا گیا ۔
شہید اسسٹنٹ کمشنر میرانشاہ شاہ ولی اور دو پولیس جوانوں کی نماز جنازہ بنوں میں ادا کر دی گئی، نماز جنازہ میں آئی جی خیبرپختونخوا، جنرل آفیسر کمانڈنگ میرانشاہ اور دیگر عسکری و سول حکام نے بڑی تعداد میں شرکت کی ۔
نماز جنازہ میں شریک ہونے والوں نے شہداء کی قربانی کو خراجِ عقیدت پیش کیا۔ شرکاء نے اہل خانہ سے دلی ہمدردی اور تعزیت کا اظہار بھی کیا ۔
نمازِ جنازہ کے اختتام پر ملکی سلامتی، امن اور شہداء کے درجات کی بلندی کے لیے خصوصی دعائیں بھی کی گئیں اور کہا گیا کہ قوم اپنے بہادر سپوتوں کی قربانیوں کو کبھی فراموش نہیں کرے گی، شہداء ملک کی سلامتی اور امن کے لیے اپنی جانوں کا نذرانہ پیش کرتے ہیں ۔
