راولاکوٹ میں کالعدم جموں کشمیر جوائنٹ عوامی ایکشن کمیٹی سے وابستہ شرپسند عناصر کی فائرنگ کے نتیجے میں قانون نافذ کرنے والے اداروں کے 4 اہلکار شہید جبکہ 20 سے زائد پولیس اور سکیورٹی اہلکار زخمی ہوگئے۔
ترجمان انسپکٹر جنرل پولیس آزاد جموں و کشمیر کے مطابق واقعے میں متعدد اہلکار زخمی ہوئے جنہیں فوری طور پر طبی امداد کے لیے قریبی اسپتالوں میں منتقل کر دیا گیا۔
انسپکٹر جنرل پولیس آزاد جموں و کشمیر نے واقعے کی شدید مذمت کرتے ہوئے کہا کہ کالعدم ایکشن کمیٹی کے شرپسندوں نے منصوبہ بندی کے تحت اہلکاروں کو نشانہ بنایا۔ ان کا کہنا تھا کہ قانون نافذ کرنے والے اداروں پر حملہ ناقابل برداشت ہے اور ذمہ دار عناصر کے خلاف سخت کارروائی کی جائے گی۔
یاد رہے کہ چند روز قبل آزاد کشمیر حکومت نے جموں کشمیر جوائنٹ عوامی ایکشن کمیٹی کو کالعدم تنظیم قرار دیا تھا۔ کالعدم تنظیم کی جانب سے 9 جون کو ہڑتال کی کال بھی دی گئی تھی۔
واقعے کے بعد علاقے میں سکیورٹی مزید سخت کر دی گئی ہے جبکہ قانون نافذ کرنے والے ادارے صورتحال پر کڑی نظر رکھے ہوئے ہیں۔
