وزیراعلیٰ پنجاب مریم نواز نے پیٹرولیم بحران کے خاتمے تک صوبائی وزرا کیلئے سرکاری فیول بند کرنے کا فیصلہ کرلیا۔ وزیراعلیٰ پنجاب نے خطےمیں جنگ کے باعث معاشی مشکلات سے نمٹنے کیلئے اقدامات کیے ہیں۔
مریم نواز نے پیٹرولیم بحران کےخاتمےتک صوبائی وزرا کیلئے سرکاری فیول بند اور سرکاری افسران کی گاڑیوں کیلئے پیٹرول اورڈیزل الاؤنس میں 50 فیصد فوری کمی کردی۔ صوبائی وزرا اوراعلیٰ سرکاری افسران کےہمراہ پروٹوکول گاڑیوں پربھی پابندی عائد کردی گئی۔
وزیراعلی نے فیصلہ کیا کہ ناگزیر سکیورٹی کیلئے صوبائی وزرا اور اعلیٰ سرکاری افسر کےہمراہ صرف ایک گاڑی ہوگی جب کہ سرکاری دفاتر میں "ورک فرام ہوم” کا فیصلہ کرلیا گیا، صرف ضروری عملہ ہی دفتر آئےگا۔ سکول، کالج اور یونیورسٹیاں 10 مارچ سے 31 مارچ تک بند رہیں گی جب کہ امتحانات شیڈول کےمطابق ہوں گے، سکول اور تعلیمی ادارےآن لائن کلاسز لے سکیں گے۔
