پنجاب میں شدید بارشوں اور اربن فلڈنگ کا خدشہ، پی ڈی ایم اے کا ہائی الرٹ جاری
لاہور: پروونشل ڈیزاسٹر مینجمنٹ اتھارٹی (پی ڈی ایم اے) پنجاب نے صوبے بھر میں شدید آندھی، گرج چمک، موسلا دھار بارشوں اور ژالہ باری کے پیش نظر ہائی الرٹ جاری کر دیا ہے۔
ترجمان پی ڈی ایم اے کے مطابق 1 سے 6 جولائی تک پنجاب کے بیشتر اضلاع میں طوفانی بارشوں کا قوی امکان ہے۔ اس دوران لاہور، راولپنڈی، گوجرانوالہ، سیالکوٹ اور فیصل آباد جیسے بڑے شہروں میں اربن فلڈنگ کا خطرہ موجود ہے۔
وزیراعلیٰ پنجاب مریم نواز کی ہدایات پر ڈی جی پی ڈی ایم اے عمر جاوید نے تمام کمشنرز اور ڈپٹی کمشنرز کو الرٹ رہنے اور ایمرجنسی انتظامات مکمل کرنے کی ہدایت جاری کر دی ہے۔
پی ڈی ایم اے کی موسمیاتی ایڈوائزری کے مطابق بارشوں کا سلسلہ دو مراحل میں صوبے کو متاثر کرے گا۔
پہلے مرحلے (1 سے 6 جولائی) میں لاہور، راولپنڈی، مری، گلیات، اٹک، چکوال، جہلم، منڈی بہاؤالدین، گجرات، گوجرانوالہ، حافظ آباد، فیصل آباد، خوشاب، سرگودھا، شیخوپورہ اور نارووال میں تیز ہواؤں اور گرج چمک کے ساتھ بارش متوقع ہے۔
دوسرے مرحلے (3 سے 6 جولائی) میں بارشوں کا دائرہ وسیع ہو کر ساہیوال، جھنگ، ٹوبہ ٹیک سنگھ، پاکپتن، ننکانہ صاحب، اوکاڑہ، قصور، نورپور تھل، بھکر، لیہ، میانوالی، بہاولپور، ڈیرہ غازی خان، ملتان، خانیوال اور لودھراں سمیت گردونواح کے علاقوں تک پھیل جائے گا۔
پی ڈی ایم اے نے شہریوں کو ہدایت کی ہے کہ بارشوں اور گرج چمک کے دوران محفوظ مقامات پر رہیں اور کھلے میدانوں، درختوں اور بجلی کے کھمبوں سے دور رہیں۔
تیز آندھی کے دوران کمزور تعمیرات، سائن بورڈز اور کچے مکانات سے بھی دور رہنے کی ہدایت کی گئی ہے۔
ترجمان کے مطابق شہری کسی بھی ہنگامی صورتحال میں ہیلپ لائن 1129 پر رابطہ کر سکتے ہیں۔
