وزیراعلیٰ پنجاب مریم نواز شریف نے صوبے میں جرائم کی شرح میں اچانک اضافے کا نوٹس لیتے ہوئے ہنگامی اجلاس طلب کر لیا۔ اجلاس کے دوران وزیراعلیٰ نے جرائم کے مختلف واقعات کی ویڈیوز خود شیئر کرکے شرکا کو دکھائیں اور سخت برہمی کا اظہار کیا، جب کہ متعلقہ پولیس افسران سے باز پرس بھی کی۔
وزیراعلیٰ مریم نواز شریف نے جرائم کی روک تھام کے لیے پیشگی اقدامات پر کام کرنے کا ہدف مقرر کیا اور شیخوپورہ و فیصل آباد میں جرائم پر قابو نہ پانے پر متعلقہ افسران کی سرزنش کی۔ انہوں نے آر پی اوز اور ڈی پی اوز کو سی سی ڈی کے ساتھ بھرپور تعاون کی ہدایت بھی جاری کی۔ اس موقع پر وزیراعلیٰ نے آر پی اوز، سی پی اوز اور ڈی پی اوز سے ویڈیو لنک کے ذریعے خطاب کیا۔
مریم نواز شریف نے کہا کہ جرائم کی شرح میں اچانک اضافہ شرمناک اور فکر انگیز ہے۔ انہوں نے کہا کہ پنجاب کو سیف سٹی بنانے کے لیے کی گئی محنت کے بعد اب کسی قسم کی سستی کی گنجائش نہیں۔ ان کا کہنا تھا کہ قتل، ڈکیتی، اغوا اور گمشدگی جیسے سنگین جرائم کا تسلسل کسی صورت برداشت نہیں کیا جائے گا، جب کہ چھوٹے سے چھوٹا جرم بھی ناقابل قبول ہے اور اسے روکنا ہوگا۔
وزیراعلیٰ نے کہا کہ پولیس کو ہر قسم کی مداخلت سے پاک کر دیا گیا ہے، اب اسے اپنی کارکردگی دکھانا ہوگی۔ انہوں نے کہا کہ سو فیصد میرٹ پر پولیسنگ کے باعث انہیں اپنے اور پرائے سب کی ناراضگی کا سامنا کرنا پڑا، جب کہ ماضی میں تعیناتیاں سیاسی وابستگیوں کی بنیاد پر ہوتی تھیں، مگر اب سیاسی مداخلت مکمل طور پر ختم کر دی گئی ہے۔
