تحریک انصاف کے چوبیس نومبر کےاحتجاج کے پیش نظر اسلام آباد انتظامیہ نے بڑے پیمانے پر تیاریاں شروع کردیں ہیں۔
ذرائع کے مطابق پی ٹی آئی نے ابھی تک احتجاج یا دھرنے کی کوئی درخواست نہیں دی۔ یاد رہے کسی بھی اجتماع کیلئے 7 دن پہلے اجازت لینا لازمی ہے تاہم تحریک انصاف پہلے ہی اجازت نہ لینے کے بارے میں بتا چکی ہے۔
اسلام آباد پولیس کی چھٹیاں منسوخ کردی گئی ہیں اور چھٹی پرگئے اہلکار واپس بلا لیے گئے ہیں جبکہ اسلام آباد انتظامیہ نے 8 ہزار پولیس اہلکار پنجاب، کشمیر اور سندھ سے مانگ لیے ہیں۔ دوسرے صوبوں کے پولیس اہلکار 21 نومبر کی رات اسلام آباد رپورٹ کریں گے، وفاقی دارالحکومت میں رینجرز اور ایف سی اہلکار پہلے ہی تعینات ہیں۔
آج رات سے اسلام آباد کے گردونواح میں کنٹینرز پہنچانے کا کام شروع ہوگا جبکہ پولیس کو آنسو گیس شیل، ربڑ کی گولیاں اور اینٹی رائٹ کٹس مہیا کر دی گئیں۔ واضح رہے کہ پاکستان تحریک انصاف کے بانی عمران خان نے 24 نومبر کو احتجاج کی فائنل کال دے رکھی ہے۔
