پاکستان سپرلیگ 11 کے کوالیفائر میں اسلام آباد یونائٹڈ کو بآسانی 70 رنز سے شکست دے کر پشاور زلمی نے فائنل کیلئے کوالیفائی کرلیا، پشاور کے 222 رنز ہدف کے تعاقب میں اسلام آباد کی پوری ٹیم 19ویں اوور میں 151 رنز بناکر آوٹ ہو گئی ۔
کراچی میں کھیلے گئے پی ایس ایل الیون سیزن کے کوالیفائر میچ میں اسلام آباد یونائٹڈ کے کپتان شاداب خان نے ٹاس جیت کر پشاور زلمی کو بیٹنگ کی دعوت دی ۔
پشاور زلمی نے مقررہ 20 اوورز میں7 وکٹ پر 221 رنز بنائے، بابر اعظم نے شاندار بیٹنگ کا مظاہرہ کرتے ہوئے 103 رنز بنائے، محمد حارث نے 35، کوسال مینڈس نے 41 رنز کی اننگز کھیلی جبکہ ایرون ہارڈی نے 20 رنز بناسکے ۔
اسلام آباد یونائیٹڈ کی جانب سے شاداب خان نے 3، رچرڈ گلیسن نے 2 کھلاڑیوں کو آؤٹ کیا، مقررہ ہدف کے تعاقب میں اسلام آباد یونائٹڈ کی ٹیم 19 ویں اوور میں 151 رنز پر آوٹ ہوگئی ۔
یونائٹڈ کی جانب سے سمیر منہاس 44 رنز بناکر نمایاں بیٹر رہے، زلمی کے ایرون ہارڈی نے 3 ،سفیان مقیم اور محمد باسط نے 2،2 کھلاڑیوں کو آوٹ کیا ،یوں پشاور زلمی پی ایس ایل 11 کے فائنل میں پہنچ گئی ۔
پشاور زلمی نے پانچویں مرتبہ پی ایس ایل فائنل کیلئے کوالیفائی کیا، یوں زلمی سب سے زیادہ مرتبہ پی ایس ایل فائنل کھیلنے والی ٹیم بن گئی ۔
کوالیفائر میں شکست کے بعد اسلام آباد یونائٹڈ کی ٹیم ابھی ایونٹ سے باہر نہیں ہوئی اس کے پاس اب بھی ایک اور چانس ہے ۔
اسلام آباد یونائٹڈ کی ٹیم جمعے کو حیدرآباد کنگزمین یا ملتان سلطانز میں سے کسی ایک کے خلاف ایلیمنیٹر 2 کھیلے گی، ایونٹ کا فائنل جمعے کو لاہور میں کھیلا جائے گا ۔
