صوابی میں ناروا اور طویل لوڈشیڈنگ کے خلاف پیسکو آفس کے باہر ایکشن کمیٹی کی جانب سے دیا گیا احتجاجی دھرنا آج تیسرے روز بھی جاری رہا۔ مظاہرین نے بجلی کی غیر اعلانیہ بندش کے خلاف شدید نعرے بازی کی اور حکام سے فوری اقدامات کا مطالبہ کیا۔
ایکشن کمیٹی کے ترجمان کے مطابق صوابی کے مختلف علاقوں میں روزانہ سولہ سولہ گھنٹے لوڈشیڈنگ کی جا رہی ہے، جبکہ لوڈ مینجمنٹ اور فورس لوڈشیڈنگ کے نام پر بھی بجلی بند رکھی جاتی ہے۔ ان کا کہنا تھا کہ شدید گرمی میں عوام بجلی کے بغیر سخت مشکلات کا سامنا کر رہے ہیں۔
ترجمان نے مزید کہا کہ شہریوں کا معمولاتِ زندگی بری طرح متاثر ہوچکا ہے اور کاروباری سرگرمیاں بھی متاثر ہو رہی ہیں۔ انہوں نے خبردار کیا کہ جب تک ان کے مطالبات تسلیم نہیں کیے جاتے احتجاج جاری رہے گا۔
مظاہرین نے حکومت اور متعلقہ اداروں سے مطالبہ کیا کہ صوابی میں بجلی کی غیر اعلانیہ لوڈشیڈنگ کا فوری خاتمہ کیا جائے تاکہ عوام کو ریلیف مل سکے۔
