پشاور: بینک ڈکیتی کی مختلف وارداتوں میں ملوث تین ملزمان محمد شعیب، محمد عمر اور محمد عماد کو پشاور کی انسداد دہشتگردی عدالت میں پیش کردیا گیا۔ عدالت نے ملزمان کا چھ روزہ جسمانی ریمانڈ منظور کرتے ہوئے پولیس کو تفتیش کی اجازت دے دی۔
پولیس کے مطابق رواں سال 20 جنوری کو انقلاب تھانے کی حدود میں ایک بینک ڈکیتی کی واردات پیش آئی تھی، جس کے دوران سیکیورٹی گارڈ کو قتل کردیا گیا تھا۔ اسی طرح 6 مارچ کو ورسک روڈ کے علاقے پیر بالا میں ایک نجی بینک میں ڈکیتی کی کوشش ناکام بنائی گئی تھی، جہاں فائرنگ کے تبادلے میں ایڈیشنل ایس ایچ او بہاری علی شہید ہوگئے تھے۔
پولیس کا کہنا ہے کہ اس کے علاوہ کوہاٹ روڈ پر بھانہ ماڑی تھانے کی حدود میں بھی ایک بینک سے رقم چوری کی گئی تھی۔ تینوں ملزمان پر ان تمام وارداتوں میں ملوث ہونے کا الزام ہے۔
عدالت نے پولیس کو ملزمان سے مزید تحقیقات اور شواہد اکٹھے کرنے کی اجازت دیتے ہوئے انہیں چھ روزہ جسمانی ریمانڈ پر پولیس کے حوالے کردیا۔
