وزیراعظم محمد شہباز شریف فتنہ الخوارج کے خلاف آپریشن کے دوران جامِ شہادت نوش کرنے والے لیفٹیننٹ کرنل شہزادہ گل فراز شہید کے گھر مانسہرہ پہنچ گئے۔
وزیراعظم نے شہید کی والدہ، اہلیہ اور بچوں سمیت دیگر اہل خانہ سے ملاقات کی اور شہید کے درجات کی بلندی کے لیے دعا کی۔ اس موقع پر انہوں نے شہید کی قبر پر حاضری دی، فاتحہ خوانی کی اور اہل خانہ کے لیے صبر جمیل کی دعا کی۔
وزیراعظم کا کہنا تھا کہ لیفٹیننٹ کرنل شہزادہ گل فراز شہید نے وطنِ عزیز کے دفاع کی خاطر اپنی جان کا نذرانہ پیش کیا اور بہادری و جرات کی اعلیٰ مثال قائم کی۔ انہوں نے کہا کہ انہیں سمیت پوری قوم کو اپنے شہداء اور ان کے اہل خانہ پر فخر ہے، اور پاکستانی قوم کبھی بھی اپنے شہداء کی قربانیوں کو فراموش نہیں کر سکتی۔
وزیراعظم نے یقین دہانی کرائی کہ حکومت اور پاک فوج شہید کے اہل خانہ کا مکمل خیال رکھیں گے۔ اس موقع پر انہوں نے مانسہرہ میں لیفٹیننٹ کرنل شہزادہ گل فراز شہید کے نام سے دانش اسکول کے قیام کا بھی اعلان کیا۔
وفاقی وزراء عطاء اللہ تارڑ، انجینئر امیر مقام، سردار محمد یوسف، مشیر وزیر اعظم رانا ثناء اللہ، کیپٹن (ر) محمد صفدر، مرتضیٰ جاوید عباسی اور شاہ جی گل آفریدی بھی اس موقع پر موجود تھے۔
