پشاور: دیر کالونی میں سکول کی چھت گرنے کے افسوسناک واقعے کی ابتدائی رپورٹ تیار کر لی گئی ہے۔
رپورٹ میں عمارت کی خستہ حالت اور سکول انتظامیہ کے اقدامات سے متعلق اہم تفصیلات سامنے آئی ہیں۔
ریسکیو حکام اور ضلعی انتظامیہ نے ابتدائی رپورٹ صوبائی حکومت کو ارسال کر دی ہے۔
ابتدائی رپورٹ کے مطابق حادثہ سکول کی نچلی عمارت کے سائیڈ والے کلاس روم میں پیش آیا۔
تیسری منزل سے چھت نیچے گری۔ رپورٹ میں بتایا گیا ہے کہ چھت تقریباً 20 سے 25 فٹ کی بلندی پر واقع تھی۔
رپورٹ کے مطابق سکول کے تمام کمروں میں تیار شدہ چھتیں لگی ہوئی تھیں۔
سب سے بالائی منزل کی چھت بارش کے باعث خستہ ہو چکی تھی۔
رپورٹ میں مزید بتایا گیا ہے کہ بچوں نے سکول کے مالک خان محمد کو چھت کی خراب حالت سے آگاہ بھی کیا تھا۔
مالک نے چھت کو عارضی سہارا دے کر اسی روز بچوں کو سکول بلایا تھا۔
ضلعی انتظامیہ نے عمارت کے دیگر حصے بھی غیر موزوں قرار دے دیے۔
ابتدائی رپورٹ کے مطابق ضلعی انتظامیہ نے متاثرہ کلاس رومز کے ساتھ عمارت کے دیگر حصوں کو بھی غیر موزوں قرار دیا ہے۔
دوسری جانب سکول کی رجسٹریشن کے حوالے سے تاحال تصدیق نہیں ہو سکی۔
واقعے کی مزید تحقیقات اور ذمہ داری کے تعین سے متعلق تفصیلات سامنے آنا باقی ہیں۔
