وفاقی وزیر خزانہ محمد اورنگزیب نے کہا ہے کہ حکومت معیشت کی بہتری کے لیے صرف دعوے نہیں کر رہی بلکہ عملی اقدامات اٹھا رہی ہے، جن کے مثبت نتائج سامنے آنا شروع ہو گئے ہیں۔
کیپٹل ڈویلپمنٹ فنڈ کے زیرِ اہتمام ایک تقریب سے خطاب کرتے ہوئے انہوں نے کہا کہ مشکل معاشی حالات کے باوجود پاکستان کی معیشت درست سمت میں گامزن ہے۔ ان کا کہنا تھا کہ اسٹاک ایکسچینج میں استحکام کے باعث سرمایہ کاروں کا اعتماد بحال ہو رہا ہے، جو ایک خوش آئند اشارہ ہے۔
محمد اورنگزیب نے کہا کہ پاکستان خطے میں امن کے قیام کے لیے پرعزم ہے اور مؤثر سفارت کاری کے مثبت نتائج سامنے آ رہے ہیں۔ انہوں نے مزید کہا کہ علاقائی کشیدگی کے پیش نظر حکومت نے محتاط حکمت عملی اپنائی ہے۔
وزیر خزانہ کا کہنا تھا کہ ملک کی ترقی کے لیے مقامی سرمایہ کاری نہایت اہم ہے، اور حکومت نجی شعبے کی بھرپور حوصلہ افزائی کر رہی ہے۔ انہوں نے بتایا کہ غیر ملکی سرمایہ کار بھی پاکستان میں سرمایہ کاری میں دلچسپی لے رہے ہیں، جو معیشت کے لیے مثبت پیش رفت ہے۔
انہوں نے اس عزم کا اعادہ کیا کہ حکومت معاشی استحکام کے لیے سنجیدہ اور مؤثر اقدامات جاری رکھے گی۔
