اسلام آباد: پاکستان کے سعودی عرب میں سفیر احمد فاروق نے اسلام آباد میں علاقائی سفرا کانفرنس کے موقع پر نائب وزیر اعظم و وزیر خارجہ سینیٹر اسحاق ڈار سے ملاقات کی۔
دفتر خارجہ کے ترجمان کے مطابق ملاقات کے دوران نائب وزیر اعظم و وزیر خارجہ سینیٹر اسحاق ڈار نے پاکستان اور سعودی عرب کے درمیان مضبوط برادرانہ تعلقات کو سراہا۔
انہوں نے دونوں ممالک کے درمیان جاری مثبت پیش رفت کو مزید مستحکم بنانے کی اہمیت پر زور دیا۔
انہوں نے تجارت، سرمایہ کاری، توانائی اور انسانی وسائل کی ترقی سمیت مختلف شعبوں میں تعاون کو مزید فروغ دینے کی ضرورت پر بھی تاکید کی۔
اسحاق ڈار نے سعودی عرب میں مقیم پاکستانی کمیونٹی کے ساتھ مسلسل رابطے کی اہمیت کو بھی اجاگر کیا۔
نائب وزیر اعظم نے دونوں ممالک کے درمیان قریبی دوطرفہ تعلقات کو مزید گہرا کرنے میں ان کے تعمیری اور مثبت کردار کو سراہا۔
