پاکستان نے آزاد جموں و کشمیر (اے جے کے) کے بارے میں ہندوستانی رہنماؤں کے اشتعال انگیز بیانات کو مسترد کرتے ہوئے متنبہ کیا کہ اس طرح کی اشتعال انگیز بیان بازی سے علاقائی امن اور استحکام کو شدید خطرہ لاحق ہے۔
دفتر خارجہ کی ترجمان ممتاز زہرہ بلوچ نے ہفتہ وار بریفنگ میں بتایا کہ حال ہی میں ایسے بیانات میں اضافہ دیکھنے میں آیا ہے۔ انہوں نے تمام بلاجواز بھارتی دعوؤں کو مسترد کرتے ہوئے بھارتی سیاست دانوں پر زور دیا کہ وہ انتخابی فائدہ حاصل کرنے کے مقصد سے پاکستان کو اپنی اندرونی گفتگو میں گھسیٹنے کا عمل بند کریں۔ . پاکستان ان دعوؤں کو مسترد کرتا ہے۔
دفتر خارجہ کی ترجمان کا مزید کہنا تھا کہ "بھارت کی بیان بازی اور دعووں کے باوجود جموں و کشمیر بین الاقوامی طور پر تسلیم شدہ متنازعہ علاقہ ہے۔ ہندوستان کے لیے دانشمندی ہوگی کہ وہ شان و شوکت کے فریب میں مبتلا ہونے کے بجائے ان اقوام متحدہ کی قراردادوں پر عمل درآمد میں مدد کرے۔
