اُرمچی: وفاقی وزیر منصوبہ بندی احسن اقبال نے کہا ہے کہ پاکستان میں ڈیجیٹل صارفین کی تعداد 15 کروڑ سے تجاوز کر چکی ہے.
وفاقی وزیر کے مطابق گزشتہ دو برس میں ڈیٹا کے استعمال میں تقریباً 25 فیصد اضافہ ہوا ہے۔
اُرمچی میں شنگھائی تعاون تنظیم ڈیجیٹل اکانومی فورم سے احسن اقبال نے خطاب کیا۔
وفاقی وزیر نے کہا کہ پاکستان میں فائبر کنکشنز 30 لاکھ سے بڑھ کر 50 لاکھ سے زائد ہو چکے ہیں۔
وائرڈ براڈ بینڈ کو ایک کروڑ گھرانوں تک پہنچانے کا ہدف ہے۔
احسن اقبال نے کہا کہ پاکستان کی آئی ٹی اور آئی سی ٹی برآمدات گزشتہ مالی سال ریکارڈ 4.6 ارب ڈالر تک پہنچ گئیں۔
انہوں نے کہا کہ احسن اقبال نے کہا کہ اُڑان پاکستان کے تحت 2035 تک ایک کھرب ڈالر کی معیشت کا ہدف حاصل کرنے کے لیے برآمدات، پیداوار، جدت، سرمایہ کاری اور انسانی وسائل پر توجہ دی جا رہی ہے۔
وفاقی وزیر نے کہا کہ شنگھائی تعاون تنظیم کے رکن ممالک کے پاس وسیع منڈیاں، توانائی و معدنی وسائل، سائنسی صلاحیتیں اور نوجوان افرادی قوت کا بے مثال سرمایہ موجود ہے۔
ہمیں ٹیکنالوجی کے صرف صارف نہیں بلکہ ڈیجیٹل مستقبل کے تخلیق کار بننا ہوگا۔
احسن اقبال نے شنگھائی تعاون تنظیم کے تحت ڈیجیٹل تجارتی راہداری قائم کرنے کی تجویز دیتے ہوئے کہا کہ کسٹمز، ترسیل، برقی تجارتی دستاویزات، ڈیجیٹل دستخط اور سرحد پار ادائیگیوں کے نظام کو باہم مربوط کیا جائے تاکہ علاقائی تجارت تیز، آسان اور کم لاگت بنائی جا سکے۔
انہوں نے کہا کہ پاکستان چین اور شنگھائی تعاون تنظیم کے ممالک کے ساتھ مل کر مشترکہ ترقی اور خوشحالی کے لیے کام کرنے کو تیار ہے۔
