خیبرپختونخوا میں دہشتگردوں کے خلاف کارروائیاں جاری ہیں اور مزید 13 دہشتگرد ہلاک کر دیئے گئے ، لکی مروت میں 10 جبکہ ڈٰرہ اسماعیل خان میں 3 دہشتگرد اپنے انجام تک پہنچا دیئے گئے ۔
پاک فوج کے شعبہ تعلقات عامہ کی جانب سے جاری بیان کے مطابق سکیورٹی فورسز نے 20 اور 21 نومبر کو خیبر پختونخوا کے مختلف علاقوں میں 2 کارروائیاں کیں ۔
آئی ایس پی آر نے بتایا کہ سکیورٹی فورسز نے لکی مروت کے علاقے پہاڑ خیل میں خفیہ اطلاع پر آپریشن کیا جس میں سکیورٹی فورسز اور قانون نافذ کرنے والے اداروں نے حصہ لیا ۔
آئی ایس پی آر کے مطابق کارروائی دہشت گردوں کی موجودگی کی اطلاع پر کی گئی، لکی مروت میں آپریشن کے دوران شدید فائرنگ کے تبادلے میں 10 دہشتگرد ہلاک کردیئے گئے،اس دوران دہشتگردوں کے ٹھکانے کو مؤثر طریقے سے نشانہ بنایا ۔
آئی ایس پی آر کے بیان میں کہا گیا ہے کہ سکیورٹی فورسز نے دوسری کارروائی خفیہ اطلاع پر ڈیرہ اسماعیل خان میں کی، جس میں سکیورٹی فورسز سے فائرنگ کے تبادلے میں 3 دہشتگرد ہلاک ہوگئے ۔
ترجمان پاک فوج کے مطابق ہلاک دہشتگردوں کے قبضے سے اسلحہ اور گولہ بارود بھی برآمد ہوا، ہلاک دہشتگرد سکیورٹی فورسز اور بے گناہ شہریوں کی ٹارگٹ کلنگ میں ملوث تھے ۔
ترجمان کا یہ بھی کہنا تھا کہ عزمِ استحکام کے تحت جاری انسدادِ دہشت گردی مہم جاری رہے گی، ملک سے بیرونی پشت پناہی یافتہ دہشت گردی کے ناسور کا مکمل خاتمہ کیا جائے گا ۔
