عوام کے مسائل کے بروقت حل کیلئے ڈی پی او مانسہرہ شفیع اللہ گنڈا پور کی سربراہی میں ڈھوڈیال میں کھلی کچہری کا انعقاد کیا گیا، اس موقع پر ضلعی پولیس آفیسر نے عوام کے مسائل سنے اور متعدد مسائل کو موقع پر حل کرنے کے احکامات جاری کئے ۔
ڈسٹرکٹ پولیس آفیسر مانسہرہ شفیع اللہ گنڈا پور کی سربراہی میں کھلی کچہری کا انعقادڈھوڈیال میں کیا گیا، جس میں عوام کی بڑی تعداد نے بھرپور شرکت کی، شہری اپنے مسائل، شکایات اور تجاویز لے کر پہنچے تو ڈی پی او مانسہرہ نے انہیں توجہ سے سنااورمتعدد شکایات پر موقع پر ہی احکامات جاری کیے گئے، جنہیں عوام نے بے حد سراہا ۔
کھلی کچہری میں ڈی ایس پی شنکیاری جاوید خان، ڈی ایس پی ٹریفک ارشد خان سمیت دیگر پولیس افسران، علماء کرام، بلدیاتی نمائندگان، میڈیا نمائندگان اور معززین علاقہ کی بڑی تعداد موجود تھی ۔
کھلی کچہری کے دوران عوامی نوعیت کے اہم مسائل پر فوری اقدامات عمل میں لائے گئے، بازاروں میں نو پارکنگ اور منی اڈوں کے خاتمے کے معاملات کو موقع پر ہی حل کیا گیا، جبکہ اسکول و کالجز کے اوقات میں بچیوں کے تعلیمی اداروں کے باہر اوباش نوجوانوں کے جمع ہونے کی شکایات پر ڈی پی او مانسہرہ نے تمام پولیس افسران کو فوری کارروائی اور ایسے عناصر کی گرفتاری کے احکامات جاری کیے ۔
ڈی پی او نے شرکاء سے خطاب کرتے ہوئے کہا کہ کھلی کچہریوں کا بنیادی مقصد عوام کے مسائل براہ راست سننا اور ان کے فوری حل کے لیے عملی اقدامات کرنا ہے۔انہوں نے کہا کہ عوام کے مسائل کا بروقت حل میری اولین ترجیح ہے، پولیس کے دروازے ہر شہری کے لیے ہر وقت کھلے ہیں ۔
انہوں نے مزید کہا کہ عوام کے تعاون کے بغیر جرائم کا خاتمہ ممکن نہیں، لہٰذا پولیس اور عوام کے مابین اعتماد اور رابطے کو مزید مضبوط بنانا وقت کی ضرورت ہے۔ انہوں نے واضح کیا کہ منشیات فروشوں، جرائم پیشہ عناصر اور قانون شکن افراد کے خلاف زیرو ٹالرنس پالیسی جاری رہے گی، کسی کو قانون سے بالاتر نہیں ہونے دیا جائے گا ۔
