ریسکیو 1122 کے مطابق شدید بارش کے باعث لینڈ سلائیڈنگ کے نتیجے میں استور سے دشکان تک سڑک 24 گھنٹے سے بند ہے، ایک کار مٹی کے تودے کی زد میں آگئی، جس سے ایک شخص جاں بحق اور دوسرا زخمی ہوگیا ۔
دریں اثناء ضلع استور اور گلگت کا زمینی رابطہ بھی لینڈ سلائیڈنگ سے منقطع ہوگیا، مقامی لوگوں کے مطابق استور میں برفانی تودہ گرنے سے سڑک بند ہوگئی ۔
گلگت بلتستان حکومت کے مطابق اپر کوہستان اچھر نالہ کے علاقے میں مٹی کا تودہ گرنے سے گلگت بلتستان اور راولپنڈی کے درمیان زمینی رابطہ منقطع ہوگیا ہے ۔
گلگت بلتستان ڈیزاسٹر مینجمنٹ اتھارٹی کے حکام نے کہا ہے کہ مسافروں کو مشورہ دیا ہے کہ وہ ہوٹلوں میں رہیں اور لینڈ سلائیڈنگ کے خطرے کے پیش نظر سفر سے گریز کریں ۔
بلتستان پولیس نے کہا ہے کہ بارش کے باعث لینڈ سلائیڈنگ سے شاہراہ بلتستان 2 مقامات پر بند ہو گئی، جس سے گلگت اور بلتستان کے 4 اضلاع کے درمیان زمینی رابطہ منقطع ہوگیا ۔
انہوں نے مزید کہا کہ پھنسے ہوئے بہت سے مسافروں اور سیاحوں کو پھنسے چھوڑ دیا گیا ہے،دوسری جانب محکمہ موسمیات نے آئندہ دو روز تک مزید برف باری اور بارش کی پیشنگوئی کی ہے ۔
