اسلام آباد: اسلامی کانفرنس تنظیم ممالک کی خواتین سے متعلق پاکستان کی میزبانی میں 9ویں وزارتی کانفرنس کل سے اسلام آباد میں شروع ہو رہی ہے.
دو روزہ کانفرنس میں او آئی سی کے 57 رکن ممالک کے نمائندے شرکت کر رہے ہیں۔
کانفرنس میں شرکت کے لئے مہمان وفود کی آمد کا سلسلہ جاری ہے۔
کانفرنس کے انعقاد کی تمام تر تیاریاں مکمل ہیں۔
کانفرنس میں او آئی سی کے 57 رکن ممالک سے تقریباً 190 مندوبین شرکت کر رہے ہیں.
مندوبین میں ممتاز خواتین شخصیات، اعلیٰ سرکاری حکام، او آئی سی کے مبصرین اور دیگر عہدیداران شامل ہوں گے۔
کانفرنس میں رکن ممالک کے وزراء خواتین کے حقوق سے متعلق ہونے والی پیش رفت کا جائزہ لینے سمیت اپنی قومی پالیسیوں کا تبادلہ کرتے ہیں اور مستقبل کے لیے نئے فریم ورک اور مشترکہ لائحہ عمل کی منظوری دیتے ہیں۔
کانفرنس کا مقصد او آئی سی کے رکن ممالک میں خواتین کے لیے ایسا سازگار ماحول پیدا کرنے کے لیے مشترکہ حکمتِ عملی مرتب کرنا ہے، جس سے وہ اپنی بھرپور صلاحیتوں کو بروئے کار لاتے ہوئے سماجی و اقتصادی ترقی میں مؤثر کردار ادا کر سکیں۔
کانفرنس میں خواتین کی سیاسی اور پیشہ ورانہ شعبوں میں شرکت بڑھانے، انہیں معاشی وسائل اور مالیاتی نظام تک بہتر رسائی فراہم کرنے، اور ٹیکنالوجی و ڈیجیٹل شعبوں میں صنفی تفاوت کم کرنے کے طریقوں پر بھی غور کیا جائے گا۔
اس موقع پر او آئی سی کے رکن ممالک کے سرکاری نمائندے خواتین کو بااختیار بنانے، ان کے حقوق کے فروغ اور جامع ترقی کے لیے باہمی تعاون کو مزید مضبوط بنانے پر تبادلہ خیال کریں گے۔
