مانسہرہ کے علاقے تھانہ خاکی میں چند روز قبل بھیرکنڈ کے رہائشی نوجوان کی ہاتھ پاؤں بندھی اور پھندا لگی لاش کا معاملہ حل ہو گیا ،پولیس نے قاتل کو گرفتار کرکے آلۂ قتل بھی برآمد کرلیا ۔
یکم اور دو جون کی درمیانی شب تھانہ خاکی پولیس کو اطلاع ملی کہ ترہا پائین کے مقام پر ایک نامعلوم نوجوان کی لاش پڑی ہوئی ہے ۔
پولیس فوری طور پر موقع پر پہنچی اور لاش کے متعلق معلومات حاصل کرنا شروع کیں تو مقتول کی شناخت زین شاہ ولد سید احمد شاہ کے نام سے ہوئی، پولیس نے مقتول کے والد کی مدعیت میں قتل کی دفعات کے تحت نامعلوم ملزم/ملزمان کے خلاف مقدمہ درج کیا اور تفتیش کا آغاز کیا ۔
واقعے کی اطلاع ملتے ہی ڈی پی او مانسہرہ محمد اظہر خان نے اندھے قتل کو ٹریس کرنے اور نامعلوم ملزم/ملزمان کو گرفتار کرنے کے لیے پولیس حکام پر مشتمل سپیشل ٹیم تشکیل دی، جنہوں نے اندھے قتل کو ٹریس کرنے کے لیے مختلف لوگوں سے پوچھ گچھ شروع کی ۔
پولیس نے بھیرکنڈ کے رہائشی بلال ولد محمد عارف کو شاملِ تفتیش کیا، جس نے دورانِ تفتیش قتل کا اعتراف کر لیا اور سرسری تفتیش میں پولیس کے سامنے اعتراف کیا کہ مقتول زین شاہ نے اس کا پستول اور پیسے دینے تھے، جس کی وجہ سے اس نے اپنے دیگر ساتھی کے ساتھ مل کر اسے قتل کیا ۔
پولیس نے ملزم بلال کو گرفتار کرنے کے بعد عدالت میں پیش کیا، جہاں سے ملزم کو دو روزہ جسمانی ریمانڈ پر پولیس کے حوالے کر دیا گیا ۔
