اسلام آباد: وفاقی وزیر مواصلات عبدالعلیم خان کی زیر صدارت نیشنل ہائی وے اتھارٹی (این ایچ اے) کا خصوصی اجلاس منعقد ہوا۔
اجلاس میں ادارے کے جاری اور مجوزہ منصوبوں، مالی سال کے اختتام کی صورتحال اور دیگر امور پر غوروخوض کیا گیا۔
اجلاس میں مری ایکسپریس وے کو مظفرآباد تک مزید 70 کلومیٹر توسیع دینے کا فیصلہ کیا گیا۔
وفاقی وزیر عبدالعلیم خان نے کہا کہ آزاد کشمیر کے عوام کو بھی مری ایکسپریس وے کی طرز پر موٹروے کی سہولیات فراہم کی جائیں گی۔
ان کا کہنا تھا کہ مری-مظفرآباد ایکسپریس وے کی تعمیر سے کشمیر کے عوام کے لیے جدید اور محفوظ سفری سہولت کا آغاز ہوگا۔
وفاقی وزیر نے ہدایت کی کہ این ایچ اے کے جاری منصوبوں کو ترجیحی بنیادوں پر مکمل کیا جائے اور نئے منصوبوں پر کام شروع کرنے سے قبل پہلے سے جاری پراجیکٹس کی تکمیل یقینی بنائی جائے۔
انہوں نے ایم M-8 موٹروے کی تکمیل کے لیے ہوشاب-آواران روڈ کو ترجیحی منصوبوں کی فہرست میں شامل کرنے کی ہدایت دی۔
وفاقی وزیر نے کہا کہ آواران نال منصوبہ اور ہوشاب-آواران روڈ ایران کے ساتھ تجارت بڑھانے کے لیے اہم ہیں جبکہ پاک ایران تجارت اور سیاحت کے فروغ کے لیے ان شاہراہوں کی بروقت تعمیر ناگزیر ہے۔
عبدالعلیم خان نے اس عزم کا اظہار کیا کہ مستقبل میں این ایچ اے کو سالانہ 3سے 4سو ارب روپے آمدن حاصل کرنے والا ادارہ بنایا جائے گا اور حکومت سے وسائل مانگنے کے بجائے این ایچ اے اپنے وسائل میں اضافہ کرے گا۔
اجلاس میں وفاقی سیکرٹری مواصلات، چئیرمین این ایچ اے اور دیگر سینئر افسران نے مختلف منصوبوں اور ادارے کی مالی و انتظامی صورتحال پر بریفنگ بھی دی۔
