ضلع ٹانک کے علاقے گومل میں گزشتہ رات نامعلوم مسلح افراد نے گومل بازار میں واقع گومل تھانے پر حملہ کر دیا، جس کے نتیجے میں تین فرنٹیئر کور (ایف سی) اہلکار اور کئی مقامی شہری زخمی ہو گئے۔
پولیس اور مقامی ذرائع کے مطابق مسلح افراد نے مختلف اطراف سے گومل تھانے پر شدید فائرنگ کی۔ حملے کے بعد پولیس نے فوری طور پر جوابی کارروائی کی جس کے نتیجے میں حملہ آور موقع سے فرار ہونے میں کامیاب ہو گئے۔
فائرنگ کے دوران تین ایف سی اہلکاروں کے علاوہ کئی مقامی کسان اور شہری بھی زخمی ہوئے۔ حملے کے باعث تھانے کا مرکزی گیٹ مکمل طور پر تباہ ہو گیا جبکہ قریبی گھروں اور دکانوں کو بھی نقصان پہنچا ہے۔
زخمیوں کو فوری طبی امداد کے لیے ڈسٹرکٹ ہیڈ کوارٹر (ڈی ایچ کیو) ہسپتال ٹانک منتقل کر دیا گیا ہے۔
پولیس اور دیگر سیکیورٹی اداروں نے علاقے کو گھیرے میں لے لیا ہے اور حملہ آوروں کی تلاش کے لیے سرچ آپریشن شروع کر دیا گیا ہے۔
