بنوں کی منڈیو سیمہ سے گزشتہ روز اغوا کیے گئے ایک شخص کی لاش آج قسمت آباد کے علاقے سے برآمد ہوئی ہے، جبکہ جنوبی وزیرستان کے علاقے وانا میں جے یو آئی-ف کے سینئر رہنما مولانا ضیاء الدین حقانی قاتلانہ حملے میں زخمی ہوگئے ہیں۔
پولیس کے مطابق اسرار نامی شخص کو نامعلوم مسلح افراد نے گزشتہ روز میریان تھانے کی حدود منڈیو میں ان کی حجرے سے اغوا کیا تھا۔ آج ان کی لاش قسمت آباد سے برآمد ہوئی، جس کے بعد پولیس نے موقع پر پہنچ کر علاقے کو گھیرے میں لے لیا اور لاش کو پوسٹ مارٹم کے لیے ہسپتال منتقل کر دیا۔ واقعے کی تحقیقات شروع کر دی گئی ہیں۔
دوسری جانب جنوبی وزیرستان کے علاقے وانا میں جے یو آئی-ف کے سینئر رہنما مولانا ضیاء الدین حقانی پر قاتلانہ حملہ کیا گیا، جس میں وہ زخمی ہوگئے۔ انہیں فوری طور پر ہسپتال منتقل کیا گیا جہاں ان کا علاج جاری ہے۔ جے یو آئی-ف نے واقعے پر گہری تشویش کا اظہار کرتے ہوئے شفاف تحقیقات اور ذمہ دار عناصر کے خلاف کارروائی کا مطالبہ کیا ہے۔
دونوں واقعات کے بعد متعلقہ علاقوں میں سیکیورٹی سخت کر دی گئی ہے جبکہ قانون نافذ کرنے والے اداروں نے تحقیقات کا آغاز کر دیا ہے۔
