ہنگو کے علاقے کوٹکی پایاں میں واقع ایک مقامی منی ڈیم میں نہاتے ہوئے پانچ بچے پانی میں ڈوب گئے، جن میں سے ایک بچے کو زندہ نکال لیا گیا جبکہ چار بچے جاں بحق ہوگئے۔
ریسکیو حکام کے مطابق جاں بحق ہونے والے بچوں میں دو سگے بھائی بھی شامل ہیں۔ ریسکیو ذرائع کا کہنا ہے کہ مرنے والے بچوں کی عمریں پانچ سے آٹھ سال کے درمیان تھیں۔
سٹي تھانے کے ایس ایچ او فیاض خان کے مطابق واقعے میں متاثر ہونے والے تمام بچے افغان مہاجر تھے۔ ضروری قانونی کارروائی مکمل کرنے کے بعد جاں بحق بچوں کی لاشوں اور زخمی بچے کو قریبی ہسپتال منتقل کر دیا گیا۔
اس افسوسناک واقعے کے بعد علاقے میں سوگ کی فضا چھا گئی ہے جبکہ بچوں کے اہلِ خانہ شدید صدمے اور غم سے نڈھال ہیں۔ دوسری جانب پولیس نے واقعے کی مزید تحقیقات کا آغاز کر دیا ہے۔
