گورنر خیبر پختونخوا فیصل کریم خان کنڈی نے حطار انڈسٹریل سٹیٹ میں قائم سلور لیک فوڈ کا دورہ کیا جہاں انہوں نے صنعتی یونٹس کا معائنہ کیا اور صنعتکاروں سے ملاقات بھی کی ۔
ہری پور: اس موقع پر تقریب سے خطاب کرتے ہوئے گورنر خیبر پختونخوا نے کہا کہ ہمارے صوبے پر دہشتگردی کا لیبل لگ چکا ہے، جس کی وجہ سے سرمایہ کار یہاں آنے سے گریزاں ہیں ۔
فیصل کریم کنڈی نے کہا کہ میری کوشش ہے کہ صوبے کا سافٹ امیج بلڈ اپ کیا جائے تاکہ سرمایہ کار خیبر پختونخوا میں انوسٹمنٹ کریں اور عوام کو روزگار کے مواقع میسر آئیں ۔
ان کا مزید کہنا تھا کہ حکومت کی جانب سے مہنگی توانائی اور غیر متوازن ٹیکس پالیسیوں نے صنعتی ترقی کو روک دیا گیا ہے، میں ہر فورم پر آپ کا وکیل بن کر کام کروں گا ۔ میری خواہش ہے کہ فیصل آباد اور لاہور کی طرز پر ہری پور میں بھی صنعتکاروں کو تمام بنیادی سہولیات میسر ہوں ۔
ان کا کہنا تھا کہ انڈسٹری چلے گی تو ملک بھی ترقی کرے گا، انہوں نے تسلیم کیا کہ زراعت کا شعبہ بھی اس وقت مایوسی کا شکار ہے، کسانوں کو بھی وہی توجہ درکار ہے جس کی صنعتکاروں کو ضرورت ہے ۔
اس موقع پر گروپ چیئرمین چوہدری ذوالفقار علی انجم نے گفتگو کرتے ہوئے کہا کہ میری انڈسٹری ‘سلور لیک فوڈ’ نے گزشتہ سال سات ارب روپے کی ایکسپورٹ کی ہے، اور آج ہماری انڈسٹری کی ملک بھر میں پھیلی شاخوں میں ہزاروں افراد کام کر رہے ہیں ۔
قبل ازیں مینیجنگ ڈائریکٹر سلور لیک فوڈ قادر محمود نے منسٹریز،ورکرز ویلفیئر بورڈ،ووکیشنل ٹریننگ اور ہسپتال جیسے ایشوز پر تفصیلی بریفنگ دی،اس موقع پر گورنر فیصل کریم کنڈی کو چوہدری ذوالفقار علی انجم نے روائیتی پگڑی بھی پہنائی گئی اور شیلڈز بھی پیش کیں ۔
