اسلام آباد: نائب وزیراعظم اور وزیرِ خارجہ سینیٹر محمد اسحاق ڈار کی زیرِ صدارت قومی اقتصادی کونسل کی کمیٹی (ایکنک) کا اہم اجلاس منعقد ہوا.
اجلاس میں ملک بھر کے مختلف ترقیاتی منصوبوں کے جامع ایجنڈے پر تفصیلی غور کیا گیا ہے۔
ان اہم منصوبوں میں خوازہ خیلہ-بشام ایکسپریس وے کی تعمیر، تربیلا فائیو ایکسٹینشن ہائیڈرو پاور پروجیکٹ، جنوبی پنجاب غربت خاتمہ پروجیکٹ اور فول برائٹ سکالرشپ سپورٹ پروگرام شامل ہیں۔
اس کے ساتھ ساتھ لیسکو، ہیسکو اور پیسکو میں بجلی کی تقسیم کی کارکردگی کو بہتر بنانے کے پروجیکٹس اور پانی، مواصلات و انفراسٹرکچر کے مختلف دیگر منصوبے بھی زیرِ بحث آئے ہیں۔
کمیٹی نے مختلف ترقیاتی منصوبوں کے نظرثانی شدہ پی سی-ون کا تفصیلی جائزہ لیا اور جاری منصوبوں کی پیشرفت کا جائزہ لیا تاکہ قومی وسائل کے مؤثر استعمال اور وقت پر تکمیل کو یقینی بنایا جا سکے۔
نائب وزیراعظم نے تمام متعلقہ حکام کو ہدایت کی کہ وہ تمام ترقیاتی منصوبوں پر بروقت اور باہمی تعاون کے ساتھ عملدرآمد یقینی بنائیں تاکہ ملک میں معاشی ترقی اور مواصلاتی رابطوں کا سفر جاری رہے۔
اجلاس میں وفاقی وزیرِ خزانہ و محصول، وزیرِ منصوبہ بندی و ترقی، معاونِ خصوصی طارق باجوہ، کیبنٹ ڈویژن، وزارتِ منصوبہ بندی اور اقتصادی امور ڈویژن کے سیکرٹریز سمیت صوبائی حکومتوں کے نمائندوں اور سینئر وفاقی و صوبائی حکام نے بھی شرکت کی۔
