پشاور (شو بز ڈیسک) سینئر ٹیلی ویژن اداکار زبیر جدون نے اخبار خیبر اور کےٹو ٹائمز سے فون پر گفتگو کرتے ہوئے کہا ہے کہ اس وقت دنیا بھر میں ہزارہ ڈویژن کے لاکھوں عوام کی مؤثر اور مثبت نمائندگی صرف کےٹو ٹی وی کر رہا ہے۔
انہوں نے کہا کہ وادیِ ہزارہ کی مردم خیز سرزمین نے ساجد شاہ، ارشد عباسی، طارق خان، رافعہ بانو، احمد سجاد، شکیل اعوان، اعجاز ترمزی اور دیگر نامور فنکاروں اور لکھاریوں کو جنم دیا، مگر سرکاری ٹیلی ویژن نے بدقسمتی سے ان کی فنی خدمات کو وہ مقام نہیں دیا جس کے وہ حق دار تھے۔
زبیر جدون کا کہنا تھا کہ کےٹو چینل نے اپنے علاقائی پروگراموں کے ذریعے ہزارہ کی ثقافت، روایات اور قدرتی حسن کو عالمی سطح پر متعارف کرایا ہے۔ انہوں نے ڈھیڈی کی بڑھتی ہوئی مقبولیت کا اعتراف کرتے ہوئے کہا کہ ہمیں اپنی ثقافت اور حب الوطنی پر فخر ہے، اور ایسے پلیٹ فارمز ہماری شناخت کو زندہ رکھتے ہیں۔
