باڑہ کے علاقے فرنٹیئر روڈ پر عزیر مارکیٹ کے قریب اس وقت خوف و ہراس پھیل گیا جب دو فریقین کے درمیان اچانک شدید فائرنگ کا تبادلہ شروع ہو گیا۔ عینی شاہدین کے مطابق فائرنگ کئی منٹ تک جاری رہی، جس کے نتیجے میں 5 افراد موقع پر ہی جاں بحق جبکہ 2 شدید زخمی ہو گئے۔
پولیس ذرائع کے مطابق ابتدائی تحقیقات میں واقعے کی وجہ زمینی تنازعہ بتائی جا رہی ہے، جو کافی عرصے سے دونوں فریقین کے درمیان چل رہا تھا۔ جاں بحق افراد کا تعلق پشاور سے بتایا گیا ہے، جبکہ زخمیوں کو فوری طور پر قریبی ہسپتال منتقل کر دیا گیا۔
پولیس کا کہنا ہے کہ فائرنگ میں ملوث ملزمان موقع سے فرار ہونے میں کامیاب ہو گئے ہیں، تاہم ان کی تلاش کے لیے مختلف مقامات پر چھاپے مارے جا رہے ہیں۔ حکام نے یقین دہانی کرائی ہے کہ واقعے میں ملوث افراد کو جلد گرفتار کر کے قانون کے کٹہرے میں لایا جائے گا۔
