بالاکوٹ (خصوصی رپورٹر) بولی حسہ کے مقام پر واقع افسوسناک واقعے میں معروف سوشل میڈیا سٹار جاوید المعروف مہانڈری افطاری کے وقت شاہد نامی پولیس اہلکار کی فائرنگ سے جان کی بازی ہار گئے۔ مقامی ذرائع کے مطابق واقعہ اس وقت پیش آیا جب مہانڈری دوستوں کے ہمراہ افطاری کے لیے موجود تھے، اور حادثاتی طور پر پولیس اہلکار نے گولی چلادی۔
ابتدائی اطلاعات کے مطابق واقعے کو ہنسی مزاح میں پیش آنے والا حادثہ قرار دیا جا رہا ہے، تاہم مقامی افراد اور سوشل میڈیا پر اس واقعے کو سیدھا سادھا قتل قرار دے کر سخت سزا کا مطالبہ کر رہے ہیں۔
اس واقعے کے بعد بالاکوٹ میں شدید کشیدگی پیدا ہوگئی اور مشتعل افراد نے غصے میں آکر تھانہ بالاکوٹ کو آگ لگا دی۔ پولیس عملے سمیت ایس ایچ او بھی بھاگنے میں کامیاب رہے، جبکہ علاقے میں حالات قابو سے باہر ہو گئے۔
عوام نے احتجاج کرتے ہوئے کاغان روڈ بھی بلاک کر دیا۔ پولیس نے بھاری نفری طلب کر کے حالات کو کنٹرول کرنے کی کوششیں شروع کر دی ہیں۔
واقعے کے فوری بعد پولیس نے شاہد نامی اہلکار کو گرفتار کر لیا ہے۔ تاہم مقامی لوگوں کا کہنا ہے کہ مقتول جاوید مہانڈری کی نعش کافی دیر تک جائے وقوعہ پر پڑی رہی اور پولیس نے متعدد بار کالز کے باوجود نعش کو اٹھانے میں تاخیر کی۔
مقامی شہریوں کا مطالبہ ہے کہ اس افسوسناک واقعے میں ملوث پولیس اہلکار کو سخت سے سخت سزا دی جائے تاکہ آئندہ کوئی بھی ہنسی مزاح یا معمولی جھگڑے کے دوران کوئی گولی نہ چل سکے۔
یہ واقعہ نہ صرف بالاکوٹ بلکہ پورے مانسہرہ کے عوام میں شدید غصہ اور احتجاج کی لہر پیدا کر گیا ہے۔
