اسلام آباد: وفاقی وزیر داخلہ محسن نقوی کی قیادت میں اسلام آباد میں غیر قانونی تجاوزات کے خلاف زیرو ٹالرنس پالیسی کے تحت بھرپور اور بلاامتیاز کارروائیاں جاری ہیں۔
ان اقدامات کا مقصد سرکاری اراضی اور اربوں روپے مالیت کی سرکاری املاک کو واگزار کرانا اور وفاقی دارالحکومت کو صاف، سرسبز اور محفوظ ماڈل شہر میں تبدیل کرنا ہے۔
چیئرمین سی ڈی اے سہیل اشرف اور ڈپٹی ڈی جی انفورسمنٹ و چیف ایگزیکٹو آفیسر ایم سی آئی ڈاکٹر انعم فاطمہ کی سربراہی میں سی ڈی اے اور ایم سی آئی کی مربوط کارروائیوں سے اس مہم کو نمایاں کامیابی ملی ہے۔
عوامی سطح پر "WELL DONE MOHSIN NAQVI” کے تاثرات سامنے آ رہے ہیں جو بہتر گورننس اور نتائج پر مبنی طرز حکمرانی کا عکاس ہیں۔
اس مہم کے تحت غیر مجاز تجارتی توسیعات، غیر قانونی کھوکھے، گرین بیلٹس اور سرکاری اراضی پر تجاوزات، فٹ پاتھوں پر قبضے اور رہائشی املاک کے غیر قانونی تجارتی استعمال کے خلاف کارروائیاں کی جا رہی ہیں۔
سیدپور ولیج، نورپور شاہاں، اسلام آباد ایکسپریس وے اور ترنول سمیت شہر کے مختلف علاقوں میں آپریشنز کے نتیجے میں ہزاروں کنال سرکاری اراضی واگزار کرائی گئی ہے جس کی مالیت اربوں روپے ہے۔
ان اقدامات سے ٹریفک کی روانی بہتر ہوئی، فٹ پاتھ اور گرین بیلٹس بحال ہوئے اور شہری ماحول میں بہتری آئی ہے۔ شہری ان اقدامات کو گورننس میں اہم موڑ قرار دے رہے ہیں جہاں قوانین عملی طور پر نافذ کیے جا رہے ہیں۔
وفاقی وزیر داخلہ کی قیادت میں اسلام آباد بتدریج ایک صاف، سرسبز، محفوظ اور دنیا کے مثالی دارالحکومت کی جانب بڑھ رہا ہے۔
