فیڈرل بورڈ آف ریونیو (ایف بی آر) کی ملک بھر میں غیر قانونی سگریٹ مینوفیکچرنگ کے خلاف کارروائیاں جاری ہیں.
ضلع ملیر کراچی میں کارروائی کے دوران ’ہونڈا سگریٹ کمپنی‘ کے نام سے قائم غیر قانونی سگریٹ مینوفیکچرنگ یونٹ پکڑا گیا۔
ایف بی آر حکام کے مطابق غیر قانونی یونٹ 2 ہزار گز سے زائد رقبے پر قائم تھا.
یونٹ میں تقریباً ایک ماہ قبل سگریٹ کی پیداوار شروع کی گئی تھی۔
یونٹ کی یومیہ پیداواری صلاحیت 100 کارٹن بتائی گئی ہے۔
کارروائی کے دوران یونٹ سے دو آپریشنل سگریٹ بنانے والی مشینیں برآمد ہوئیں۔
مشینوں میں سے ہر ایک کی مالیت تقریباً 30 کروڑ روپے بتائی گئی ہے۔
اس کے علاوہ دو ٹوکن مشینیں، پیکنگ مشین، پلاسٹک ریپر مشین، فلٹر بنانے والی مشین، 300 کے وی اے کا جنریٹر اور سگریٹ کی تیاری میں استعمال ہونے والی دیگر مشینری بھی تحویل میں لے لی گئی۔
ایف بی آر کے مطابق کارروائی میں 60 کارٹن سگریٹ، تقریباً ڈیڑھ لاکھ کھلی سگریٹ اسٹکس، 50 سے زائد بورے تمباکو، فلٹرز کے 24 کارٹن اور پیکنگ میٹریل کے 47 کارٹن بھی قبضے میں لیے گئے۔
ایف بی آر حکام کا کہنا ہے کہ غیر قانونی سگریٹ مینوفیکچرنگ یونٹ کے خلاف مزید تحقیقات جاری ہیں۔
برآمد شدہ سامان کی حتمی مالیت، مزید برآمدگی اور تحقیقات سے متعلق تفصیلات بعد میں جاری کی جائیں گی۔
