محکمہ موسمیات نے آئندہ چوبیس گھنٹوں کے دوران ملک کے بیشتر علاقوں میں گرم اور خشک موسم کی پیشگوئی کی ہے، جبکہ چند بالائی علاقوں میں بارش کی توقع ظاہر کی گئی ہے۔
تفصیلات کے مطابق گزشتہ روز لاہور میں درجہ حرارت 38 ڈگری سینٹی گریڈ ریکارڈ کیا گیا، جس کے بعد شہر اور اس کے گرد و نواح میں ہیٹ ویو الرٹ جاری کر دیا گیا ہے۔ شہریوں کو ہدایت کی گئی ہے کہ وہ غیر ضروری طور پر گھروں سے باہر نکلنے سے گریز کریں اور دھوپ میں احتیاطی تدابیر اختیار کریں۔
محکمہ موسمیات کے مطابق خیبرپختونخوا کے بالائی علاقوں، کشمیر اور گلگت بلتستان میں کہیں کہیں تیز ہواؤں اور گرج چمک کے ساتھ بارش کا امکان ہے، جس سے موسم میں قدرے بہتری آ سکتی ہے۔
اسی طرح بلوچستان کے شمالی علاقوں میں بھی ہلکی بارش کی پیشگوئی کی گئی ہے۔
ماہرین کے مطابق میدانی علاقوں میں گرمی کی شدت میں مزید اضافہ ہو سکتا ہے، اس لیے شہریوں کو خصوصاً دن کے اوقات میں احتیاط برتنے اور پانی کا زیادہ استعمال کرنے کی ہدایت کی گئی ہے۔
