ہری پور: ضلع ہری پور میں پانچ سو سالہ قدیم روایت پر مبنی تین روزہ جشنِ ہزارہ کی رنگا رنگ تقریبات کامیابی کے ساتھ اختتام پذیر ہو گئیں، جن میں ہزاروں افراد نے بھرپور شرکت کی اور مختلف ثقافتی و کھیلوں کے مقابلوں سے خوب لطف اندوز ہوئے۔
جشن کے آخری روز کھاد فیکٹری کے مقام پر بیل دوڑ کے سنسنی خیز مقابلے منعقد کیے گئے، جن میں ہری پور سمیت مختلف اضلاع سے آئے ہوئے شرکاء اور شائقین کی بڑی تعداد نے شرکت کی۔ بیل دوڑ کے ان مقابلوں نے حاضرین سے خوب داد وصول کی۔
تین روزہ جشنِ ہزارہ میں اسپیکر صوبائی اسمبلی بابر سلیم سواتی، ایم پی اے اکبر ایوب خان سمیت متعدد سیاسی و سماجی شخصیات نے بھی خصوصی شرکت کی، جس سے تقریب کی رونقیں مزید بڑھ گئیں۔
تقریبات کے دوران کبڈی، پتھر اٹھائی، مونگلی کشتی اور باڈی بلڈنگ کے دلچسپ مقابلے بھی منعقد کیے گئے، جن میں کھلاڑیوں نے شاندار کارکردگی کا مظاہرہ کرتے ہوئے شائقین سے بھرپور داد سمیٹی۔
خانپور ڈیم کے دلکش مناظر کے درمیان پیراگلائڈنگ کے مقابلے بھی ہوئے، جن میں سابق اپوزیشن لیڈر عمر ایوب خان، سابق صوبائی وزیر یوسف ایوب خان اور دیگر شخصیات شریک ہوئیں۔ شہریوں نے فضائی کھیلوں سے خوب لطف اٹھایا۔
اسی مقام پر کشتی رانی کے مقابلے بھی منعقد کیے گئے، جنہوں نے بڑی تعداد میں لوگوں کو اپنی طرف متوجہ کیا۔ تین روزہ جشنِ ہزارہ نے نہ صرف ثقافتی روایات کو اجاگر کیا بلکہ خطے میں تفریحی سرگرمیوں کو بھی فروغ دیا۔
