گلگت بلتستان: چیف الیکشن کمشنر راجہ شہباز خان نے اہم پریس کانفرنس سے خطاب کرتے ہوئے واضح کیا ہے کہ گلگت بلتستان میں عام انتخابات 7 جون کو ہی منعقد ہوں گے اور انتخابات ملتوی ہونے سے متعلق تمام خبریں بے بنیاد اور من گھڑت ہیں۔
انہوں نے کہا کہ ایک ہفتے کے اندر گلگت بلتستان میں بلدیاتی انتخابات کے شیڈول کا بھی اعلان کر دیا جائے گا۔ ان کے مطابق دس اضلاع کے 24 حلقوں کی ووٹر لسٹیں مکمل طور پر تیار کر لی گئی ہیں، اور اس بار ووٹر لسٹوں میں ووٹروں کی تصاویر بھی شامل کی گئی ہیں۔
چیف الیکشن کمشنر نے ایک صحافی منظر شگری کا حوالہ دیتے ہوئے کہا کہ انہوں نے ایک سوشل میڈیا پوڈکاسٹ میں ووٹر لسٹوں میں مبینہ گڑبڑ کے حوالے سے دعویٰ کیا تھا، جس کی وجہ سے انتخابات کے التوا کی افواہیں پھیلیں۔
انہوں نے کہا کہ ان کے دروازے تمام صحافیوں کے لیے کھلے ہیں اور درست معلومات حاصل کی جا سکتی ہیں، اس لیے عوام، امیدواروں اور اداروں کو افواہوں کے بجائے ذمہ دارانہ رپورٹنگ کو فروغ دینا چاہیے۔
انہوں نے مزید کہا کہ 7 جون کے انتخابات کے لیے تمام انتظامات مکمل ہیں، اور الیکشن سے دو روز قبل تمام انتخابی مواد بشمول ووٹر لسٹوں کی کاپیاں متعلقہ ریٹرننگ آفیسرز تک پہنچا دی جائیں گی۔
چیف الیکشن کمشنر کے مطابق پورے گلگت بلتستان میں صاف، شفاف اور پرامن انتخابات کو یقینی بنایا جائے گا۔
