گلگت بلتستان میں عام انتخابات 7 جون 2026 کو ہوں گے، اسمبلی کے انتخابات کی تیاریاں زور و شور سے جاری ہیں ۔ الیکشن میں 24 جنرل نشستوں پر مقابلہ ہوگا، 19 خواتین امیدوار بھی میدان میں ہیں ۔
گلگت: گلگت بلتستان کی قانون ساز اسمبلی کی کل نشستیں 33 ہیں، جن میں خواتین کیلئے 6 جبکہ ٹیکنوکریٹس کیلئے 3 مخصوص نشستیں مختص ہیں ۔
گلگت بلتستان میں رجسٹرڈ ووٹرز کی تعداد 9 لاکھ 63 ہزار 34 سے ہیں، مرد ووٹرز کی تعداد 5 لاکھ 6 ہزار 97 جبکہ خواتین ووٹرز کی تعداد 4 لاکھ 56 ہزار 9 سو 37 ہے،صوبے بھر میں 1400 سے زائد پولنگ سٹیشنز قائم کیے جانے کا امکان ہے، پولنگ سٹیشنز میں مرد، خواتین اور مشترکہ سٹیشنز شامل ہوں گے ۔
چیف الیکشن کمشنر کے مطابق الیکشن کمیشن کی جانب سے پولنگ سٹیشنز کی حتمی فہرست جلد جاری ہوگی، انتخابات کیلئے سیکیورٹی پلان بھی ترتیب دیا جا رہا ہے،انتخابات کیلئے امیدواروں نے کاغذات نامزدگی جمع کرائے تھے، 19 خواتین امیدوار بھی میدان میں ہیں، جانچ پڑتال کے بعد 400 سے زائد امیدوار میدان میں رہ گئے ۔
انتخابات میں پاکستان پیپلز پارٹی، مسلم لیگ ن، استحکام پاکستان، پاکستان نظریاتی پارٹی، ایم ڈبلیو ایم، جماعت اسلامی، جمعیت علمائے اسلام، اسلامی تحریک سمیت سیاسی مذہبی پارٹیاں اور آزاد امیدواران حصہ لے رہے ہیں ۔
مختلف سیاسی و مذہبی جماعتوں کے 402 امیدوار میدان میں ہیں، یہ انتخابات گلگت بلتستان اسمبلی کی چوتھی مدت کیلئے منعقد ہو رہے ہیں،7 جون کو ووٹرز اپنے نمائندوں کا انتخاب کریں گے ۔
